AGS mælir fyrir eignaupptöku á Íslandi fyrir braskara

Þessar hugmyndir Alþjóðagjaldeyrissjóðsins (AGS) um útgáfu skuldabréfa í erlendri mynt og rakalausri hækkun stýrivaxta eins og kom fram í viðtölum fulltrúa sjóðsins í sjónvarpsfréttum í gær bera allar að sama brunni:
Að koma sem mestu af upphæð svonefndrar "snjóhengju" yfir í erlendan gjaldeyri til að tilgreindir eigendur innstæðnanna sem hér um ræðir (vel yfir 1000 milljarðar kr) geti flutt þær úr landi í erlendri mynt. Eftir sæti íslenskt efnahagslíf á heljarþröm og íslenskur almenningur í skulda- og skattaklöfum til frambúðar. Þarna er ekki verið að hugsa um velferð íslensku þjóðarinnar heldur hagsmuni viðkomandi innstæðueigenda sem eru samkvæmt þessu ómótmælanlega undir styrkum verndarvæng AGS, eðli málsins samkvæmt.

Lilja Mósesdóttir, í Samstöðu flokks lýðræðis og velferðar, hefur ítrekað bent á úrræði sem duga til lausnar á þessum yfirvofandi snjóhengjuvanda.
Sú lausn felst í því að "verðfella" þessar inneignir á sanngjarnan hátt með því að taka upp nýja íslenska mynt, Nýkrónu, þar sem þessar innistæður fengjust ekki yfirfærðar í hina nýju mynt (og í framhaldi af því e.t.v. í gjaldeyri) nema á ca. 90% lægra gengi en aðrar innstæður og fjármunir. Upptaka á Nýkrónu yrði nauðsynleg ef ekki reynist löglegt að setja tilsvarandi háan "útgönguskatt" á snjóhengju-innstæðurnar þannig að aðeins lítill og bærilegur hluti hennar færi úr landi í erlendri mynt. Tilgangurinn er að verja hagsmuni almennings á Íslandi og komast hjá hörmungum.

Þessi bráðnauðsynlega niðurskrift á snjóhengjuinnistæðunum ber að skoða í ljósi þess að þeir aðilar sem eiga hana munu hafa fengið þessa fjármuni fyrir "slikk" eða um 4% af nafnverði í kjölfarið á hruni bankanna! Þeir ætla sér hins vegar að græða margfalt (25-falt) á braski sínu á kostnað almennings á Íslandi og hafa hingað til notið dyggilegrar aðstoðar AGS og talsmanna sjóðsins erlendis og hérlendis við það. Þetta má þeim aldrei takast.
Þeir íslensku stjórnmálamenn sem vísvitandii eða af óvitahætti ætla sér að styðja þessa stefnu AGS og framfylgja henni í reynd eru ekki sannir fulltrúar íslensku þjóðarinnar. Þeir myndu þá opinbera sig sem hagsmunagæslumenn annarra nú í aðdraganda næstu kosninga.

Alþingismenn hafa ráð landsins í hendi sér. Þeir skulu hugleiða það vandlega og aldrei gleyma að þjóðin kýs þá hverju sinni til að gæta hagsmuna íslensku þjóðarinnar í heild.

AGS styður útgáfu skuldabréfa

Athugasemdir

[Kristinn Snævar Jónsson, 29.9.2012 kl. 18:16]

Hins vegar er það afar jákvætt sem kemur fram í viðhengdu fréttinni þar sem segir: "Sjóðurinn telur einnig þörf á útgönguskatti á eigendur aflandskróna, sem þyrfti að vera verulegur, í því augnamiði að skapa hvata fyrir aflandskrónueigendur til að taka þátt í aðgerðum sem miða að afnámi haftanna."

Þetta virðist sýna að AGS er þó ekki alls varnað, ef marka má orð fulltrúa sjóðsins. Þarna er tekið undir skoðanir Lilju og fleiri sem eru henni sammála um að komast verði hjá því að öll snjóhengju-upphæðin komi til yfirfærslu í erlendan gjaldeyri við afnám gjaldeyrishaftanna sem hyrfi þar með úr landinu og sem myndi skilja gjaldeyrisvarasjóð Íslands eftir tóman og með óbærilega skuldabyrði og vaxtagreiðslur til útlanda. Þarna tekur AGS undir skoðanir um leið sköttunar á útstreymi snjóhengjuinnistæðnanna samfara afnámi gjaldeyrishafta. Þarna kemur að vísu ekki fram hversu hárri sköttun AGS mælir með, en hún þarf að vera mjög há til að komast hjá efnahagshörmungum í landinu.

[Kristinn Snævar Jónsson, 30.9.2012 kl. 13:37]

Eitthvað hafa krækjur í umrædda frétt sem ég tengdi við upphaflega hliðrast til á mbl.is, en hér er upphaflega krækjan:

http://www.mbl.is/vidskipti/frettir/2012/09/29/ags_stydur_utgafu_skuldabrefa/

Þar benda fulltrúar AGS á það ráð að gefa út langtímaskuldabréf í erlendri mynt til lúkningar á snjóhengjuinnistæðunum. Að vísu kemur ekki fram hjá þeim nein upphæð í því sambandi, fremur en varðandi hugsanlegan "útgönguskatt" á þetta fjármagn.